رحلة الي كوكب خريبتون!

النسيان او علي حد قول ويكيبديا عدم تذكر المعلومات والمهارات والخبرات التي مر بها الفرد و هو ظاهرة طبيعية تحدث لجميع البشر .
طبعا ده كلام فارغ انا عارف انك اكتر انسان بتنسي في العالم... بعديا طبعاً

 طول عمرنا بنشتكي و بنشتم في ذاكرتنا , و يمكن بنستخدمها كتير كشماعة كل ما نتزنق حتي ساعات بنقول اننا نسينا و احنا في الحقيقة منسناش و فيه سبب تاني منعنا . و مع كل هذه الاتهامات التي لاقاها النسيان علي مر العصور قررت اظهر انا علي صهوة توكتوكي  و ادافع عن صديق عمري و أتخذ منحي ايجابي في التفكير و اتخيل ان نص الكوباية مليان .

عايزك بقي تتجرد من اشلاء جسدك الفانية و تقفز بجواري في المقصورة لرحلة للعالم لا نسيان فيه. 

تخيل كده لو انت قادر تفتكر كل -ﻷ ايه كل دي انا شاب روش- خليها every single 

تخيل كده لو انت قادر تفتكر every single حدث حصل في حياتك, ازاي هتقدر تستمتع بأي لحظة حلوة في حياتك و انت في اللحظة دي فاكر كل التجارب السخيفة اللي مريت بيها في حياتك و الاشخاص اللي فقدتهم و الحروب اللي خسرتها, ازاي هتقدر تكمل حياتك و انت دايما فاكر الناس اللي كانوا اجزاء من شخصيتك و مكنتش تتصور حياتك من غيرهم و هم حاليا مش موجودين.

 طب بلاش ازاي هتقدر تعافر و تموت نفسك عشان تحقق حاجة و انت فاكر كل المرات اللي عملت كل حاجة عشان توصل لهدف و في الاخر فشلت و مجهودك لم يثمر؟

تخيل بقي لو كل الذكريات السيئة اللي انت افتكرتها و اللي مأفتكرتهاش كلها حاضرة في دماغك ليل نهار ؟ و انت مع اصحابك أو اهلك او في شغلك او في خروجة حلوة او في الخرا الجامعة 

ازاي هتقدر تضحك في وش الناس و تقضي وقت ممتع ؟

طب بلاش خلينا ننتقل لقارة تانية في كوكب خريبتون حيث انك انت و شخص ليكن اسمه سامي -سامية للبنات اللي مبتصاحبش سامي- اصدقاء مقربين للغاية و عشرة سنين بقي و الكلام ده كله 

تخيل انك مريت بتجربة مريرة و كنت في اشد الحاجة ان سامي ده يقف جنبك و يساندك و لكنه لسبب او لاخر تخلي عنك و ده خلي الفترة دي من حياتك زي الزفت, المهم بقي عدي الوقت و سامي حس انه غلط في حقك و جه يصالحك. ازاي هتقدر تصالحه تاني و " تنسي " الوقت اللي احتاجته و هو اتخلي عنك؟ فملخص الكلام ده ان You can't forgive if you can't forget

و هنا الاخر يا جماعة مش هخش بالتوكتوك في عالم " بلا تسامح " حاكم هيبقي برميل رخامة.

و مما سبق اقدر استنتج ان النسيان هو اسلوب للتكيف مع ماَسي الواقع المهترئ, هو نظام حماية بدائي يساعدنا للبقاء علي قيد الحياة ليوم اَخر.

فتخيل بقي بعد كل اللي " النسيان " عمله عشانك و كل المشاكل اللي ساعدك تتجاوزها تيجي انت تشتمه عشان نسيت نص قانون عدم التأكد لهايزنبرج في الامتحان...

صحيح.. الصوحاب في أجازة.

لو عندك رأي تاني سبلي كومنت و انا هاحرص اني ارد عليك و نتبادل السٌبّاب و اصابع الاتهام و نسفه من اراء بعض و كل الكلام الجميل ده.